Մեր ընկերության տասնամյակը

Նոյեմբերի 4-ին մենք տոնում ենք մեր ընկերության տասնամյակը։ Ընկերության, որը չի սահմանափակվում ՍՊԸ-ի երրորդ տառով սկսվող բառի նշանակությամբ, ընկերության, որը մեր ու ձեր միջև է՝ մեր հաճախորդների, գործընկերների, ինչու ոչ, նաև մրցակիցների ու բոլոր-բոլորի, ում հետ հասցրել ենք ընկերանալ այս տասը տարիների ընթացքում։

Մեր ընկերությունը սկսվեց 2014-ին, երբ մի քանի մարդիկ համախմբվեցին, մտածեցին Հայաստանում ֆինանսական կյանքը պարզեցնելու մասին և սկսեցին տեղադրել առաջին կանաչ տերմինալները Երևանի փողոցներում։ Այդ օրերից ի վեր մեր ընկերությունը մեծացել է ու վերափոխվել․ նոր գործառույթներ են առաջացել, գործընկերների ու հաճախորդների հետ նոր կապեր են ստեղծվել, հեռանկարներն ու գաղափարներն են ընդլայնվել, իսկ այն մի քանի տերմինալները չորս հազարի են վերածվել և տեղադրվել ոչ միայն Երևանի, այլև Հայաստանի ամբողջ տարածքում։

Ապա եկավ 2017-ը, և Հայաստանի կանաչ տերմինալներին միացավ easywallet-ը՝ էլեկտրոնային պարզ դրամապանակը, որը թույլ տվեց մեր հաճախորդներին կատարել ֆինանսական գործարքներ ցանկացած վայրից, ցանկացած պահի։

Եվ չնայած easywallet-ից և EasyPay տերմինալներից օգտվելը պարզ է, մենք ոչ պարզ աշխատանք ենք տարել այս պարզությունն ապահովելու համար։ Տարիների ընթացքում լսել ու հասկացել ենք հաճախորդների տարբեր կարիքներ ու համագործակցել շատ գործընկերների հետ։ Արդյունքում՝ EasyPay-ն իր ծառայությունների մեջ ընդգրկել է կյանքի ու գործունեության տարբեր ոլորտներ՝ օգնելով մարդկանց վճարել կոմունալ, բժշկական, ապահովագրական, պետական, բանկային և շատ այլ ծառայությունների դիմաց, կատարել մեքենային առնչվող վճարումներ, ստանալ փոխանցումներ արտերկրից, գնել միջոցառումների տոմսեր, ստանալ օնլայն վարկ և էլի շատ բաներ, որոնք ներառված են առաջարկվող 1000+ վճարատեսակի մեջ։

Մենք միշտ բաց ենք եղել հետադարձ կապին մեր բոլոր ընկերներից՝ և՛ հաճախորդներից, և՛ գործընկերներից, և՛ աշխատակիցներից։ Մենք տեսնում ենք մեր հաճախորդներին մեր մասնաճյուղերում ու լսում նրանց խնդիրները, ստանում ենք նրանց զանգերն ու նամակները և փորձում գոհացնել։ Մենք խրախուսում ենք մեր թիմակիցներին ու գնահատում ընկերության հետ կիսած նրանց մտքերն ու ջանքերը։ Մենք կարևորում ենք մեր յուրաքանչյուր գործընկերոջ հետ ստեղծված վստահելի ու գեղեցիկ կապը։

Այսպիսին է եղել մեր ընկերությունը արդեն տասը տարի, և կանենք ամեն ինչ, որ այն շարունակվի դեռ երկար տարիներ։ Շնորհակալ ենք այս ամուր ընկերության ու վստահության համար։ Շնորհավորում ենք նաև ձեզ, չէ՞ որ այսօր մեր ու ձեր ընկերության տասնամյակն է ♥